Enn zour, to pou tous lorizon.
To pou poz lipie kot okenn zom pa'nn marse.
Lor rit enn milie perkision ki pou bat ek to leker a linison.
Enn zour, to pou rebwaz enn dezer.
To pou permet twa reve, riye, sante, danse anba lapli, anba soley.
To lespri pou vwayaze, vagabonde ek liberte enn rwadezer.
Enn zour to pou kontan, e pou kontan twa.
To pou dekouver enn lamour pli gran ki lesiel, pli for ki diaman.
To pou viv sak moman pase dan so prezans, to pou seri li san rezerv e si enn zour li ale, to pou rekonesan to'nn viv li.
Enn zour, mo pou pran twa dan mo lebra.
Mo pou konn apresie sak segonn ki liniver donn mwa akote twa.
Mo pou aprann retrouv to konfians kan malgre mwa, mo pou desevwar twa.
Mo lebra pou to satofor kan lemond pou kraze otour twa e mo zepol pou to refiz kan pwa lavi pou tro gran pou sarye.
Enn zour, kan to pou la, mo pou pare pou akeyir twa e donn twa enn lamour ki inior ravaz letan.
Twa, mo soley ki briy ek enn lalimier san parey.
Twa mo zanfan, pli zoli trezor mo lespri inn permet mwa reve.
Twa, kado lesiel ki mo nam pe espere.
.
.
.
.
.
#photography #photoart #nature #naturephotography #instaphoto #instaphotooftheday #macro #birdstagram #igersmauritius #mauritius #mauritiusisland #mauritiusexplored #monilemaurice #moris #birdsofinstagram #birds #birdstagram #shot #igphoto #birdlovers #agameof10k #agameoftones #thevisualcollective #theimaged #leagueoflenses #throughthelens #visualsofearth #visualsoflife #shoot2kill #exclusive_shots #closeupshot